عاوزني ابقي متفائل !!....طيب ازاي و ليه ؟؟

بسم الله الرحمن الرحيم

كتير بنلاقي ناس بتتكلم عن التفاؤول و الامل و اننا ما نياسشي ابدا
لما بنسمع الكلام ده او بنقراه ساعات بيعمل تاثير كويس جوانا لكن بتوالي الايام و الظروف الصعبه بيتكون جوانا سؤال و هو عنوان البوست ده..عاوزني ابقي متفائل !!....طيب ازاي و ليه ؟؟

ايوه لازم تكون متفائل و عندك امل لان...
واحد قايم و سايبني و بيقوللي استني ايه يا ابني انت....هو انت هتدور لينا نفس الاسطوانة المشروخه بتاعت الامل و التفاؤل و مش عارف ايه
يا اخي اصبر بس....ان الله مع الصابرين
تعالي نجرب مع بعض الماررادي مش هنخسر حاجة
هسالك سؤال....اللي حصل معاك ده و الظروف الي انت فيها دي مين السبب فيها؟؟
اصل انا حظي وحش و الدنيا دايما مقفله ابوابها في وشي
يا صاحبي انت بتضحك علي نفسك...عارف ليه؟؟
ليه يا افلاطون افندي ؟؟
اصل الظروف دي بتكون حاجة من اتنين..
-يا اما قدر و ربنا كتبه علينا زي مثلا ان صاحب مصنع يخسرلا مصنعه مره واحده بسبب حريقة او المنافسة الغير شريفه من الاخرين
وفي الحاله دي يبقي نصبر و نحمد ربنا لان ربنا اسمه الرحمن الرحيم و كمان اسمه الرؤوف و برضه اسمه الحكيم يعني كل شيء لحكمة و مهما كانت ظاهره لينا انها من غير سبب...فده لان عقوةلنا البشريه قاصره عن انها تفهم حكمة الله تعالي في الامور

-يا اما بتكون نتيجة لاننا ما اخدناش بالاسباب..يعني احنا اللي بنعمل ظروفنا في الحالة دي و بكده بقي لازم اننا نفكر بشكل مختلف و نراجع نفسنا من تاني و نعرف ان مادمنا عايشين يبقي لسه فيه امل

قال الله تعالي
(و لا تيئسوا من روح الله انه لا يياس من روح الله الا القوم الكافرون)

خلي املك في ربنا كبير...و ارمي حمولك و همومك عليه و صدقني ربنا هيكرمك و يوفقك بس خليك انت واثق فيه مهما حصلك

انسي موضوع الاعذار و اللوم علي الظروف و الحظ....احنا اللي بنعمل حظنا بايدينا و ربنا ما بيظلمشي حد ابداااااااا
خد بالاسباب و اذا فشلت مره فاعرف انه النجاح صعب...مش من اول مره هتحققه انما لازم الصبر و طولة البال
بتقوللي...يادي الصبر و طولة البال....ما احنا صبرنا خدنا ايه يعني...سيبك يا عم انت من وجع الدماغ ده انا عارف نفسي حظي وحش و فقري

يا حبيبي اذا كنت شايف نفسك خيخه و اي كلام و ما تقدرشي تصبر و تبتدي من تاني خلاص خليك زي ما انت و لا اقولك روح شوفلك تربه و ادفن نفسك فيها و السلام

يا جماعه خللوا املكو في ربنا كبير....و اعرفوا ان الله لا يخلف الميعاد و ربنا ما بيظلمشي حد و لكل مجتهد نصيب
خدوا اللينكات دي جميله جدا و اكيد ان شاء الله هتستفيدوا منها....
مجموعة محاضرات للدكتور ابراهيم الفقي http://www.haridy.com/ib/showthread.php?t=73915
لا تحزن للدتور عائض القرني http://www.saaid.net/book/open.php?cat=82&book=2046
انشودة يا صاحب الهم http://audio.islamweb.net/audio/index.php?page=audioinfo&audioid=85740


اشوفكو في البوست اللي جاي

سلام

انا بيحصللي كدا ليه ؟؟!!!

بسم الله الرحمن الرحيم

يا تري سالت نفسك السؤال ده قبل كده ؟؟
يا تري فكرت فيه ؟؟

طيب حاولت تشوف ليه اجابه ؟؟

واحد بينادي عليا: انت يا عم الامور بترغي في ايه مش عارف انا ؟؟ ما توضح بتتكلم عن ايه هو احنا ناقصينك انت راخر ؟؟

حاضر يا عم سيب دراعي و انا هاقول اهوه

انا بيحصللي كدا ليه؟؟.......سؤال بيمر علينا سواء بارادتنا او غصبا و اقتدار عننا لما :-
لما تلاقي نفسك بترجع لورا و الناس بتتقدم عنك حتي اللي كنت انت شايفهم اقل منك بقوا اودامك
لما يحصلك ابتلاء سواء مرض او فقد شخص عزيز او خسارة شيء غالي
لما تكون عايز حاجة و بتتمناها اوي...لكن ما يحصلشي اللي انت عايزه

كتير بتقابلنا علامة الاستفهام دي في حياتنا............بس يا تري بنجاوب عليها بايه؟؟
يا تري بنغضب و نثور و نقول ليه يارب كدا و اشمعني انا من دون الناس ؟؟
و لا بنقول ما هو انا دايما ظي وحش و بختي مايل ؟؟
و لا بنشتم في اي حد او نلعن الظروف و يمكن نكسر اي حاجة اودامنا اهو نفش غلنا في اي حاجة ؟!!
و لا نقول اهو مافيش فايده و نبتدي نبص لغيرنا و نمصص الشفايف و نظام النفسنه يشتغل ؟؟؟

انا رايي الشخصي في الموضوع ده ان علاجه هو الرضا
ايوه الرضا....يعني نرضي باللي كان
واحد بيقوللي...و نرضي بس ازاي يا عم انت ماهو حاجة تطهق لما ..
استني بس يا عم النيرفز انت....هسالك سؤال

هو اللي حصل معاك ده بعلم الله و لا بدون علمه؟؟؟
ما تجاوب؟؟....سكت ليه

و خد السؤال ده كمان........هو ربنا رؤوف رحيم فعلا و لا انت شايف حاجة تانيه غير كده ؟؟
ايه يا عم هو احنا هنكفر و لا ايه...طبعا ربنا رؤوف رحيم

طيب مادمت انت عارف كده...يبقي ترضي
اقولك علي حاجة.....بتحب ربنا؟؟....بتحبه صحيح؟؟...طيب لما يقدر عليك حاجة حتي لو انت شايفها وحشه...تعترض و تقوله ليه يارب و اشمعنا انا و تزعل منه ؟؟!!
ده يصح برضه؟؟....هو اللي بيحب حد بيقوله كده !!


سلام

بسم الله الرحمن الرحيم

كتير بيكون جوانا علامة استفهام و ما بتلاقيش جواب
و ساعات بتكبر علامة الاستفهام دي معانا و برضه بتكبر حيرتنا

في المدونة دي هنحاول مع بعض نخرج علامات الاستفهام دي اللي محبوسة جوانا
و هنتكلم بخصوص كل شيء مش لاقيين ليه اجابه
و هندور مع بعض علي حل لكل حاجة خنقانا او محيرانا

و الان...اعلن افتتاح المدونة

و سيري علي بركة الله يا نورماندي تو !!

سلام